Yoko Tsang 香港美容及食療專家: 賀年購物篇---神級蘿蔔糕

有讀者email問我，叫我推介好食的年糕及蘿蔔糕。
這一問就挑起我條為食神經，我除了擅於解答美容知識，問我食乜好，我也很有心機去回答，甚至發一篇blog去回應這條為食大過天的問題。

直接D講，我係從來唔食年糕的，肥加油膩夾高脂肪兼膽固醇，完全違背我的覓食宗旨，所以不好意思，我也沒有甚麼好年糕推介給大家。

但一講到蘿蔔糕，就可以同大家落足心機分享！
好食的蘿蔔糕，必備的條件是以蘿蔔絲為主，最怕放太多粘米粉，咬落成口漿糊的感覺，絕不好受。臘味、金華火腿、冬菇、蝦米等份量也要足，食落才有豐富的甘香味道層次。以上就係好味蘿蔔糕的必備條件。

今年我會買的蘿蔔糕，分別有三間，推介得的，都係我心目中的神級極品，大家不妨參考一下。

名人坊糕王蒸煎兩佳宜

是我的資深blog友就知，我的其中一個飯堂就係中環名人坊（重溫：食完要減肥的名店 — 名人坊），上星期剛剛去完，就係為了順便訂蘿蔔糕！只要曾探訪名人坊都知道，他們的餐前免費小食就係煎蘿蔔糕，我就曾經因為想食這個小食而又去幫襯。

他們的蘿蔔糕味道及選料無懈可擊，而且蘿蔔和粉的比例適中，口感軟滑，在煎的過程也不易散開，襯埋自家製XO醬就係惹味一絕。然而，於個人而言有美中不足之處，就是蘿蔔刨得太幼絲非切成粗條狀，變相無咁多汁；其臘味的比例較少，喜愛吃臘味蘿蔔糕的或許會覺得不夠喉。

講起煎，其實不是我喜歡的食法，但這個蘿蔔糕的厲害之處，係煎都可以唔使落油亦唔會散晒！就咁切件放落平底鑊煎即可，俾心機慢火烘兩邊就可以皮脆糕嫩；若果轉做我最喜愛的蒸法，名人坊蘿蔔糕更係非常方便，因為用上超耐熱膠盒去儲存，只需成盒放入蒸爐就可以，適合我這類怕麻煩的！

不過它的價錢就絕不便宜，細細盒售$168，隔日取貨，我問過訂到月尾30號咋。由於不含防腐剷，必需五日內食晒，結果我一個人兩日食晒！

講開又講，我今次有食神眷顧，原於「錯有錯著」事件一則：話說上星期我哋兩個人去「名人坊」食晚飯，由於對方碌咭時碌錯銀碼（我老公居然懞然不知，本來係$1,0XX，但碌了$1,8XX，簽咗賬兼走人），當我第二日去拎蘿蔔糕時，經理才告知收錯了錢，退款之餘仲多送我一盒蘿蔔糕和一樽XO醬，哈哈，賺了！（多收老公的$800現金、一盒蘿蔔糕，同埋XO醬^_^）

名人坊高級粵菜
中環九如坊3號中環蘭桂坊酒店一樓
3650 0066

神樣蔡san推介農圃糕王

「農圃飯店」是我另一間喜歡的食店，每次飲茶都必點他們的蒸蘿蔔糕，因為該店的蘿蔔糕是非常之出色。內裏蘿蔔切成粗條狀的，清甜香味特別濃，咬落口甚至可以嚐到新鮮的蘿蔔汁；臘腸選取兩分肥三分瘦，甘香又油潤；整體味道very good，食完唔會口喝。剛剛看到《壹週刊》，才知道蔡瀾先生是買它送給朋友做賀年手信！