2011年10月6日星期四

$30入會 平歎僻靜中山私房菜

週一,打風過後,悶局。
當日節目係約了我個御用髮型師 --- Private-i Teddy設計一個新髮型,為了應付今、明兩日,去TVB為新一季《姊妹淘》做嘉賓,講下秋冬潮流fashion及妝容護膚等。
點知同Teddy講下講下,又講到去食,佢話要帶我去見識下
「企鵝雞!」
真係成隻企鵝咁款,造形超搞笑!為左食佢,三個人食晚飯都夾硬點了一隻雞,事關企鵝雞必需原隻叫,冇半隻賣架!而成隻雞就係以如此造形落鑊油炸。
影完相,侍應立即大剪一揮,將隻企鵝雞斬件,斬法仲有得俾我揀,我揀留起雙髀雙翼,其餘碎上:
當堂有兩隻大髀跟兩隻雞全翼,最難得的是,呢度係用新鮮文昌雞去整呢道菜,今時今日,就算我去利苑、龍皇,都冇新鮮雞食,全部都係用冰鮮雞去整。點分佢係用新鮮雞?雞味香濃係其一,當隻雞斬開睇見D骨髓仲係血紅色,就知係新鮮雞,冰雞雞的骨髓,一早變成黑灰色。


企鵝雞都未算精彩,下一味即燒乳豬仔,真係未試過咁好食,就算去酒店婚宴食酒席的乳豬,都冇佢咁好食,立即睇下:
原隻燒原隻上,幾乎保留乳豬最鮮味一刻,睇完對辨,立即在你身邊斬件!
啖啖肉兼肉質鮮美,乳豬剛剛養到戒奶就要上台變食物,所以會比較大隻,但豬身就不會有一朕豬羶味,證明個廚都好用心去揀食材。
炸鯪魚球咪睇小一味得個炸字,實情呢度炸得好有技巧,點解呢?呢粒炸鯪魚球,食到最後,都冇縮過水或者變縐皮,因為油溫控制得宜,令鯪魚球真係地膨脹,而非魚速「吹脹」,因為技術好,仲炸得好好味添!再加上睇埋個心:
居然釀入蜆介,食落有爆漿口感,外醮蜆介、內釀蜆介,從外而內都充滿風味!
生菜煲係菜同煲分開上,又係堂弄的拿手菜式,第一身感受鑊氣,食完一身油煙味!
咁豐富的翠塘豆腐,真係第一次見,將玉子豆腐切粒再混和水蛋清蒸,技巧十足的小菜。
食到飽一飽,仲未夠喎!梗係加個馬拉糕先夠喉。我近來頗迷馬拉糕,只要做得夠古法正宗,我都會叫個當甜品,何況當你見到隔籬台都叫,我就真係忍唔住囉!
好好味,好鬆軟呀!
講咁耐都未講店名,我係特登的,想大家睇到口水流兼追極都未知係邊度!其實呢間所謂的李房菜,在上環區非常有名,這間「小杬公」,希望以私房菜格局去做中山菜,頭幾味見到的企鵝雞、乳豬、鯪魚球,都係中山菜,再混合各地中菜而成。而小杬公因以會所牌申請食肆,所以只接受會員顧客。就算你未係會員,都可以即時以$30入會,仲會送你叉燒一碟。
地址:上環干諾道中133號誠信大廈1樓
電話:2511 5566
————————————————————————————————————————
本週《MORE》專欄精采內容:GimmickFunny心水美容品
為了提高這群懶女人的扮靚意慾,讓我搞搞新意,推介富趣味性又具實用性的心水美容產品,定必能提高大家的護膚興趣。
詳情請留意今期《MORE》雜誌內我的專欄。

沒有留言:

發佈留言

注意:只有此網誌的成員可以留言。