2011年3月14日星期一

海南雞情意結

我對海南雞飯就是有一份情意結,懶理有甚麼新食廈新食肆開張,都未必會第一時間去試,但只要當我知有有新的海南雞飯,多千辛萬苦,都一定要試到入口方休。
加上這次為好友細Ken慶祝生日食飯,又有幾位為食兵團成員在陣,一於食爆佢張menu,睇真一點呢間「亞洲家族」除了海南雞,仲有冇其他美食!

大廚是前新加坡文華Chatterbox大廚賴育祥,亦即是上年助陣世貿中心「海南少爺」的大廚,這人手勢我上年已經試過(詳情請重溫:寸得滯的海南少爺!),感覺一般。
一次唔得,唔代表我不再給予機會,因為蔡瀾先生的好評,我就再來一次看看水準有否改善!
我最喜歡這些清楚簡潔的menu,一次過列出十大星馬名菜,唔使揭menu揭到傻。
首選海南雞,一望已經知對辨,至少雞皮與肉之間唔會有一層萬年脂肪,肉質睇落已經鮮嫩,完全超出上一次在海南少爺的水平。
這三小碟調味料更加不要錯過,尤其係薑茸,配雞送油飯,我咁怕肥都食了一碗!
雞油飯要特登在 menu上開一頁講解,擺明做足功課,唔係求其雞油撈飯就算。
咪睇佢咁油膩,在坐男士都一人兩碗落肚,再加我自己一碗,五人進餐十碗油飯,癲!
本來想叫足一隻海南雞,不過入單後先知得番半隻,伙記提議另外半隻叫炸雞,一樣咁正,脆皮食法更吸引在坐男士,我不喜炸物,剝走層皮齋食雞肉,出奇地同海南雞係一樣,只係脆皮之分。
呢碟叫蠔蛋,初時以為同潮式蠔仔蛋差唔多,點知係好似我最愛的白飯魚炒蛋一樣做法,隻蠔仲非常大隻兼新鮮,意料之外咁正。
我上次去海南少爺食星洲炒蘿蔔糕,粒蘿蔔糕「硬到放六粒入骰盅勁搖,都可以搖到六個六嗌爆骰」(呢句係我老公叫我咁寫,雖粗鄙但貼切),呢度就完全唔同,粉少蘿蔔多,好味。


以下三味有待改善,不過我都要講下點解唔得:


第一樣係福建蝦湯燴麵,麵冇蝦湯味,蝦湯好似燴唔入麵(或蝦湯唔夠蝦味?),普通到不得了,我老公食完一啖只係話:「真係幾 福建 喎!」(好明顯佢又借機講粗口囉)


第二樣係胡椒蝦,蝦的雪味太強,咁重口味的胡椒都蓋唔過雪味,解凍功夫做得唔夠,只要稍加改善就再冇此問題的。


第三樣係巴東牛肉,牛肉揀晒最韌最乾瘦的部份,又冇筋,醬汁餵唔入牛肉內,咁你明啦。
最後進入「開飯.com」模式,講價錢,五人同行一人免費(請生日主角食飯嘛),埋單一共$996,以上菜式再加十碗油飯八罐可樂,除五就每人二百,除四即係每人二百五,只係我叫得多,普通咁食不致於太貴,有好食的也可不好食的東西,請小心選擇。



地址:銅鑼灣告士打道264-269號海宮大廈地下5號鋪
電話:28369000
——————————————————————————————————————–
本週《MORE》專欄精采容:煉金術  還原BB肌
今次要介紹給大家的magic products-Julisis,是遵照著嚴謹的煉金術指引,在世界上只有兩所實驗室能夠做到,就是運用超凡的「液化技術」,仿如鑰匙般開啓肌膚通道,與細胞結合,發揮最佳修復效能。
詳情請留意今期《MORE》專欄。

沒有留言:

發佈留言

注意:只有此網誌的成員可以留言。