2010年7月13日星期二

大阪急行之食 黑店+青葱沙律章魚燒

Hi!首次與各位 More 網民見面。當得悉將成為 VIP blogger 之時,剛巧身在機場出癹日本京阪度蜜月之旅,順理成章將旅程點滴作為這個 blog 的見面禮。

出發前,心想大阪甚麼也該比東京遜色,而向來愛唱反調的日本通老公卻說大阪消費比東京平、美食亦比東京好。就睇吓我買到幾多潮物、食到幾多好嘢才算!

首日到埗,抵達大阪梅田 New Hankyu 酒店 check in 已是晚上九點,本來打算到旅遊書推介的「燒鳥一郎」食我最喜愛的 yakitori,豈料見到酒店旁有一條食街「梅田美食橫丁」,全是大阪地道美食,心諗搵食最緊要地道,一於闖闖。途經一間門面極地道的燒鳥店,門外更有熱情拉客,兼用國語及中文 menu 款待,老公憑直覺謂即走咪幫襯(原因容後再解釋),但我饑腸轆轆也懶理,堅持一試並立即 order!

闖黑店!

女侍應用流利國語說每位必需先點 ¥400 的前菜燒鴨串,另外所有串燒亦必需「逐盤」order 而非「逐串」order,這與牆上日文逐串計的意思不同,加上以往在日本搵食亦從未試過如此「專制」。唉!即時醒覺誤闖黑店,只怪自己的饑餓埋沒理智,最後硬著頭皮與按住怒火點了一客 ¥500 低質燒雞翼便速逃,難食兼難為自己,浪費了 ¥1,300。

人間美食章魚燒!

其實這位於梅田的美食橫丁也非浪得虛名,巷頭有間「章魚燒」早午晚都塞滿人,真係掂!章魚燒屬大阪名物,既然食在根源,大家商議點人氣 No 1 的' Negimayo Takoyaki',上面鋪滿切碎青葱和沙律醬,連葱連醬連章魚燒一齊塞落口,先品嚐到爽脆青葱,然後是軟綿麵漿,再到彈牙章魚粒,從未試過咁好味的章魚燒!

留大阪 4 日食足 4 次,仲要超平,¥480/8 粒,之後我去東京再食咗 6 間章魚燒,賣¥500 先得 6 粒咋!剛才慘遇黑店的悶氣立即全消,之後仲搵到間勁正食肆,下篇再講!

沒有留言:

發佈留言

注意:只有此網誌的成員可以留言。