2010年7月13日星期二

大阪急行之買 堀江掘到Chanel潮物


由於日本之旅的原定計劃是食、玩在大阪,買就在東京,所以在大阪時先到環球片場,再到訪天王寺動物園睇可愛到極嘅小浣熊,待走前半天才到「大阪原宿」堀江。

結果只得半日行堀江係整個行程最錯的部署!原來起碼要行足一日,大把筍嘢買!

點去堀江?所有旅遊書都有教,但去邊度買好嘢?我講!

必蒲 select shop

行完成條堀江,買得最多是 Chanel fake items!即係擺明車馬以 Chanel 做 muse 的潮物。例如有曾在中環遮打大廈外牆出現的溶解 Chanel logo 疑似服飾,包括:

剪裁似菱形的跌膊 T-shirt dress,mix & match 至少可變 5 款 style,襯西裝褸、皮褸、熒光色 legging、熱褲、knee length boots 都得。此 T-shirt dress cutting 前短後長, 要做得好,在港也難尋,更何況質料不俗,夠墜,著上身很貼、唔 bulky。

還有溶解 Chanel logo 閃銀耳環,銀黑色可雙面用,大大個夠晒搶眼,勝在塑膠料輕巧,唔會墜到耳都長埋,雖然香港中環九如坊的小店也有類近款式,但日本標價只不過 ¥1,575,比香港早前有售的平成半,已入貨的你相信必氣在心頭。

即使我唔係 LV fans, 連溶解 LV logo 頸鏈都唔放過,冇計,咁大陣仗都只係 ¥1,260,平過銅鑼灣不知名頸鏈添,照入手。

鞋當然不能放過,尤其係有特式的,即使家中已珍藏過百,冇位列陣,照買、買、買!呢對 lace ankle boots 只售 ¥6,000,在東京見到同款賣成 ¥10,000,這裡平得可憐。另一新歡是 99% 酷似 Helmut Lang 的黑橡根×杏色羊仔皮 ankle boots,簡約得來超型,一見鍾情如在呼喚著我,盛情難卻!遇著 off season,激安半價售 ¥8,600,叫我點忍手!

睇到呢度係咪好想知件仿 Chanel T-shirt dress 幾錢呢?黑色嗰件 ¥6,000,白色呢件 ¥4,000,可惜各只剩 last one,否則會買齊兩個款的黑白色。我老公仲癲,全個日本 trip 在這店買得最多,衫褲鞋褸乜都齊,埋單都唔過 ¥100,000,超滿足。

埋單時發現 counter 有張 poster,話如用手機登記 QRcode,再有 5% off。嘩!等同免稅喎,不過我部 iPhone 「嘟」 唔到,點算!?「日本通」即打蛇隨棍上:「冇 5% discount,唔買!」哈,店員乖乖就範,仲問 5% O 唔 OK 添!本來我想接著話 10% 先 OK,不過「日本通」用手截停我,話唔好得寸進尺,事關對方已經露出好委屈的表情。

呢間 select shop 算係成條堀江最掂,男裝女裝都非常到位,最重要係價錢平,外套唔過¥10,000,tee 就 ¥4,000-¥5,000。有本地亦有外國品牌,如 Moschino、Marc Jacobs 等等。

若想知地址?留個 comment 畀我,大家交流吓!謝!

沒有留言:

發佈留言

注意:只有此網誌的成員可以留言。