2010年7月13日星期二

台劇宅配入屋

前幾日食完台灣空運牛肉麵,個心已經飛到台北市中心!

刻不容緩上埋 www.egltours.com 睇台灣 package 精選,若非另一半堅持要睇世界盃,今個 weekend 已經身在台灣啦!

如無意外,7 月台北之旅必成行,希望 7 月下旬前可以返港,趕住買 iPhone 4 同 iPad 行貨呀!

仲有成個月至去台灣,呢個月點頂台灣癮先?一於煲幾套台劇,呢個習慣每每在將要成行前的指定動作,正如去東京瘋狂 shopping 前都會煲下日劇一樣,感受吓異國氣氛,順便睇吓嗰邊有咩熱潮!

老實講,台劇唔一定比港劇好睇,節奏慢到離譜,但勝在偶像陣容真係靚到殺死人,阮經天、趙又廷、賀軍翔、隋棠、白歆惠、大S ... 要幾靚有幾靚。

香港就慘咯,睇小生 ... 苗僑偉、謝天華、陳豪,再數落去係曹永廉?!但我唔係想睇實力派囉。

再到獎門人,童顏中女江欣燕又重出江湖?再搭多個金剛和 Otto,可能外國人會以為香港娛樂圈冇靚人。

說到底都是錢作怪!當紅偶像只得幾百蚊 show 錢幫 TVB 拍劇,回報就是增加曝光率及入屋?可知謝霆鋒為內地電視台拍劇的酬勞高達 30 萬人民幣一集,斷估佢唔會求求其其咁去演出啦。

台劇有保證,皆因偶像收得正常酬勞,起碼不會馬虎演出斷自已米路,仲會出盡全力「chok」樣「chok」表現。

最新又想睇的是 5月23日首播、何潤東監製的《泡沫之夏》,有大S、黃曉明同何潤東,不過至今只得 2 集,萬一好好睇咪吊住條癮?

所以揀睇《偷心大聖 PS男》,有藍正龍、溫昇豪、隋棠及白歆惠,加埋一線可愛童星小小彬,依家去到第 15 集,逢星期六晚上 9 點做。

由大S前男友藍正龍擔正,飾演溝女無數食完即飛的知名兩性作家,遇著命中剋星的台灣名模隋棠,靚女卻要扮低能幼稚園女教師;仲有溫昇豪做富豪第二代及白歆惠在劇中做回名模的角色,加上可愛童星小小彬,集台灣最靚男、女、小童偶像。

藍正龍正正係個D奸樣靚仔,性格陰沉估佢唔到。

隋棠就俾人喪話佢整容,但係佢嗰一口國語真係好甜。

溫昇豪又係寸寸貢咁嘅款,有D似後生版陳豪。

白歆惠一副原始武器格,正常男人對住佢應該會死硬。

套戲的特點係節奏超慢,劇情擺明係飛紙仔,睇觀眾反應同收視而隨時修改再跟住拍。

咁都好睇?咪就係好睇在夠喪,藍正龍明明好憎隋棠,但為了溝白歆惠就搵隋棠過橋,點知白歆惠唔受溝,結果隋棠暗戀藍正龍。後來藍正龍得罪有錢仔溫昇豪,溫要封殺藍,後來知道藍要溝白,就落力溝白。照牌面睇,普通四角戀之嘛,TVB 都拍到啦,有幾爆呢?

喪在觀眾鍾意藍同隋一齊,就硬改劇情變成藍主動追隋,不過愛是無敵,幾複雜都好,藍正龍都要向隋棠表白!難為白歆惠無啦啦做咗賣剩庶,仲突然話佢係未婚媽媽,小小彬就係佢個仔,搞到白最近成日喊苦喊忽。

劇情癲到咁,TVB 又做唔做得出呢?講真,台灣網友一樣鬧到飛起,但係邊鬧又邊睇,電視台就理得,收視高企咪得囉!

台灣劇叻在識得同觀眾玩互動,劇情絕對跟住收視同觀眾喜愛而修改。最近仲興用facebook宣傳,網友可以add藍正龍同隋棠做facebook friend,當然,呢個只得劇中角色。但劇內會有他們的facebook出現,幾認真。

想睇台劇可以點?我都係上網睇,推介呢個台灣節目網:sugoideas.com,所有台劇、綜藝節目都有齊,難得網主即日 upload 所有節目,真正做到最快最新。

有乜好睇?先睇 《鑽石夜總會》,最近在 facebook 廣泛流傳的妝前妝後扒女變索女,就係呢個綜藝節目的其中一個環節。


想知台灣最新的化妝、潮流資訊,必睇《女人我最大》。


另一個必睇的當然係小S 的《康熙來了》,一個藝人的訪談智慧、搞笑急才、瘋狂言論盡現,亞太區目前冇主持能及。

2 則留言:

  1. 我要來推薦現在台灣最紅的台劇.叫做"犀利人妻".由隋棠主演. 超超好看...
    住在香港的台妹

    回覆刪除
  2. 謝謝你的推介,我也有看群利人妻喔,小禎表現得很搶鏡,就像平日罵李進良一樣,爆笑!

    回覆刪除

注意:只有此網誌的成員可以留言。