2010年7月13日星期二

眼部遮瑕品 心水推介


前天收到以下 comment,知道好多女仔最介意眼圈、眼袋曝露人前,我會將揀遮瑕膏比喻為揀男友,各有喜好與各有所需,用邊隻 concealer 好視乎閣下的眼部肌膚間題,和祈望達到的效果,絕非同出一轍。
本人天生皮膚薄,加上血液循環唔好,眼圈色素特別現,最討厭是有條青筋在眼尾透出,好多化妝師都用盡辦法試圖幫我修飾得完美無暇,現在就集各家大成,並將自身經驗告之,希望幫到大家揀合心水的遮瑕膏啦!
先解答 blog 友提問:「Bobbi Brown eye corrector + concealer 遮得勁 d 嗎? 會唔會起乾紋呢?」
完美妝效之選!
Bobbi Brown corrector 眼部矯色霜 + creamy concealer 遮瑕霜
呢對遮瑕孖寶係我有重要場合時必備,雙劍合壁可以修飾 95% 眼圈色素,自己動手也有很專業的妝效。
先講 corrector,它是呈米黃色,用掃薄薄上一層巳經即時打亮暗沉膚色、tune 走超過一半黑色素,質地潤而立,因為含有幾種可減淡色素的修護成分,所以絕不會現乾紋,若然只想於素顏時減輕驚嚇指數,建議單塗也可,但緊記要輕撲上碎粉以免溶化,能即時減輕倦容。
想有更完美遮瑕效果,就要再搭配遮瑕霜,當然可以用其他品牌,但我試過質地未必夾,互相溶合得唔埋想;有成 7 種色揀,最好都係親身去 counter 由化妝師幫妳試色,佢哋會教埋有咩技巧要注意,例如用掃上效果點解貼服過用手指、若然現乾紋點樣按壓、最後撲碎粉時千奇咪左右拖,應該用掃壓上等等...。
經驗之談,此組合遮瑕效果確係完美,幼紋可以撫平,但較深紋理都係搞唔掂,現晒形!自問眼紋多的可以單買corrector,或較新的 tinted eye brightener 筆,質地更透薄輕盈,同樣可令眼部肌膚變得明亮,但遮色素不及 corrector 好。

Bobbi Brown corrector 眼部矯色霜 $200

Bobbi Brown creamy concealer 遮瑕霜 約$170

Bobbi Brown tinted eye brightener $290

表現最優勝!
Laura Mercier secret concealer 眼遮瑕霜
與 Bobbi Brown concealer 同屬霜狀質地,很 creamy,於個人而言,覺得 Laura Mercier 較潤,色澤偏粉調適合白皙膚色,而 Bobbi Brown 則偏黃調適合帶黃至較黑膚色。
呢盒遮瑕霜係我用咗最多年兼至愛,質地夠潤唔會容易現乾紋,且柔軟觸感延展性佳,用手指按上表現平均非常易 handle,只要少許即可,遮瑕度都不錯,可以掩飾約 8 成眼圈色素,最啱返工趕時間用。
又由於含有許多的保濕成分,可當作眼影的基底,改善暗沉的眼瞼膚色,一物二用呀!

Laura Mercier secret concealer $175

裸妝好幫手!
Clarins eye perfecting base 魔法持久眼底霜
佢係我近日新歡!相信大家會覺得出奇,Clarins 最出名皇牌不是 slimming products 嗎?的而且
確,我中六已經搽到依家,超過十年喇,更估唔到係呢支遮瑕筆咁好用,楊丞琳都有讃。
Clarins 遮瑕筆無論在外貌形態和多效功能上,與 YSL 明彩筆都極相似,但我試過兩者後會認為
YSL 贏名氣多 D,例如《女人我最大》節目中著名化妝老師都常推薦為最愛妝品;我個人認為 Clarins 表現非常好、價錢仲平。在眼下及眼周部位掃上,再用指腹輕勻推覆,其柔焦感及光折射因子能有效修飾暗沉色調,具透亮光感且不厚重,雖則只可以掩飾約 7 成眼圈色素,但我就是愛它效果自然,若然是眼圈困擾不深的妳,一試必愛上!若然眼圈色素深沉,就建議先塗粉底再用呢支遮瑕筆,好水潤唔會厚妝。
我平日多數只會塗上 Sofina Albanc 防曬乳液再配合此遮瑕筆,因為防曬液令膚色白咗、均勻咗,再做少少遮瑕步驟已經見得人,唔使成日塗粉底咁傷皮膚,帶住佢出街以備補妝亦很方便又慳位!
仲可以一物多用呀!作為 eye base 令眼影更加顯色和持久貼服、又可以遮暗瘡印(蜜桃色與面色很match)、搽在鼻翼減淡暗啞(有明亮因子配方)、遮掩毛孔和掩飾虎紋(以指腹輕按壓,質地如乳液有撫平功效)。

Clarins eye perfecting base $200

最啱成孰肌!
Estee Lauder Re-Nutriv 白金級遮瑕膏
Re-Nutriv 屬於這個品牌最貴 line,價錢唔平,但對於眼部問題勁多的成熟肌,呢 D 錢唔慳得!事緣與著名化妝師 Candy Law 一齊做 job 時,見到佢用在 model 上妝效超 good,我當然即刻試上眼,嘩!咁厲害,好潤呀,遮得效果唔錯喎。此事發生在上年尾,我隨之往銅鑼灣白沙道專門店,竟然斷貨,等足兩個月至有,証明真係多人鍾意好好賣。
深淺雙色組合可以自行混色,調出最適合個人的遮瑕效果,仲有幾款色澤組合可選;而其質地綿密最啱覆蓋細紋和眼圈色調,但缺點是要有技巧和心機,否則容易有厚重感覺;最 buy 當然係含有矜貴修護成分,有助增加眼部肌膚彈性與緊緻,化妝同步護膚,用得特別心安理得!

Estee Lauder Re-Nutriv 白金級雙色遮瑕膏 $305

Tips:
1) 想塑造 nude 妝,將遮瑕膏溝埋濕粉才上眼部位置,會更潤、效果更自然和唔易起紋。
2) 在眼圈位掃上光影粉可將黑色素折射及分散,亦有助遮蓋黑眼圈。
3) 遮瑕霜一定要比粉底稍亮一些(一至兩個色調)。若眼圈呈現灰白色,即為過亮;若看起來偏黃,即為過暗。
4) 遮瑕膏不要塗得太厚,以免欠自然,最好用手指輕印方法推按不要推抹,否則會令眼部四周皮膚顯得乾燥 。
5) 不要塗完遮瑕膏才上濕粉,這樣會推散晒遮瑕膏。
6) 最後用大掃撲一層薄薄的碎粉將遮瑕霜固定,若用粉撲則看上去會較厚重。
7) 用任何遮瑕產品前當然要做足修護保濕功夫,切忌用啫喱質地眼霜,會起擦子膠粒。個人强力推介 dermalogica multivitamin power firm,它是用於眼及唇部的速效修護精華,集多種維他命,滋潤、抗皺功效卓越,最讃是柔滑質地與啞緻效果,塗於眼底再上遮瑕霜會非常貼服兼能減淡紋理,確是絕配!

dermalogica multivitamin power firm $688/15ml,價錢頗貴,上網買或上樓舖會有折扣。

沒有留言:

發佈留言

注意:只有此網誌的成員可以留言。