2010年7月13日星期二

經濟有危就有機......歐洲買袋、日本買錶!

近日財經版、港聞版上的「歐豬四國」、「希臘危機」或「匈牙利壞賬」的來龍去脈,其實我都唔多清楚,只關注於歐圓跌到七個一皮,1 歐圓兌 9.3 港紙,此時此際最好離港購物,去歐洲行一轉,將成副身家敗晒落 Chanel!
剛在 facebook 上看到友人從歐洲度蜜月回來,寧願碌爆身上所有信用咭,將 Hermes、LV、Chanel、Gucci、Prada 的戰利品鋪滿酒店張床,也要做個破產的貴婦,實在羨慕不已,亦怪自己太早去歐洲了。
Mrs Fan:唔好意思,從你 facebook 借來一用,你的戰績恨死女人、嚇怕男人!
話說早前 2 月才到巴黎,當時兌歐圓的匯率是 1:11.4,足足貴現時匯率 2 大圓,但都勇往直前闖入 Chanel。今時今日法國 sales 對中國人的咀臉可畏必恭必敬,皆因全店顧客都是黑頭髮黃皮膚的中國人,禮遇度比我在廣東道或利園 Chanel 都超然,香港 Chanel 的服務固然極佳,但當日那法國店員在我還未開口要購物時,已經奉上礦泉水,我也不好意思空手而回吧。
以當日匯率而言,退回 13% 消費稅後,法國 Chanel 價約是香港售價的八五折。上週有朋友從法國公幹回港,他說以現時匯率計,法國 Chanel 大約是香港價七折,他本來只買一個 Chanel 送給女朋友,但因太抵,結果買了兩個。
那麼歐圓平,日圓也平嗎?我可以放棄台灣之旅轉飛日本喎,身邊人已經一句拋窒我:「日圓仲貴,¥100兌$8.6!」此時記起 4 月日本之旅時的兌換率是$8.1。
一言驚醒夢中人,那當今世上最著數的豈非日本人?用日圓去歐洲購物最著數,立即 check 下日本名牌水貨,結果 Chanel、LV之類的名牌仍然比香港貴,但部份 Rolex 款卻比香港平,唔好以為香港人直飛瑞土買 Rolex 會更平,我最初都有此錯覺,卻原來瑞士並非歐圓區,用瑞士法朗的,匯率無跌。而我所講的都是日本的水貨 Rolex,從瑞士以外的歐洲地區返貨。有幾平?
以 Sea-Dweller Deep Sea 為例,43.5mm 直徑,是 Rolex 史上最大錶圈的手錶,女仔纖纖玉手襯大錶,非常型格,更是這年來最 hit 的Rolex 運動錶款之一。香港行貨公價 $68,500,公折 8% off,即$63,020。在日本中野錶店 Jackroad 的水貨定價是¥652,000(連稅),香港人憑護照則免稅,扣稅後實收 ¥620,952,以8.6算計,折合約 $53,401,相差近一萬。熟知 Rolex 的朋友告訴我,在香港買到最平最平的水貨 Deep Sea 也要$60,000 左右,兩地差價足夠五日四夜東京 package 加慳慳地的三餐。假如 Yen 價回落至 8 算左右,更加抵買。
冇花冇假,只要上 www.jackroad.co.jp 立即睇到。其他如炒款 Daytona 則同香港差不多價錢。另有Panerai、IWC等名錶及大量古董 Rolex。
咁你又會問,是否安心唔會買到假貨先?我聽講有些香港所謂的水貨店都會將二手翻新貨當新貨賣喎!呢層絕對放心,日本人做生意大多勻勻真真,再加上經我親身測試...........係用真金白銀測試,我前前後後幫 Jackroad 買過四次錶,更拎過上香港代理驗明正身實屬正貨,仲次次都比香港買更平。
Jackroad 的門口冇招牌,要望落地毯上先見到店名。
古董 Rolex 的藏量非常驚人,我個伴每次見到D Paul Newman Daytona 都流晒口水,但售價要¥700萬至¥1000萬,即$60-$86萬港紙,等我......發達至送畀你啦!
點去呢?中野 JR 站只有一個商場加一條叫 Sun Mall 的商店街,從中野站北口一出就見到,沿 Sun Mall 商店街一直向前行會見到一個好細的商場叫「Boardway」,上3樓就搵到。呢間 Jackroad 係唔少香港識途錶迷必到之秘店,而呢個商場類似香港灣仔的東方188商場,專賣中古男仕玩具、玩物、手錶、電器、遊戲機,幾乎係女性禁地,除非買錶,否則不適合女士一遊。而商店街中有間叫「壽司久」的壽司店,又平又好食,我每次都會重溫。
從中野站北口一出就見到 Sun Mall 商店街
Jackroad
東京都中野區中野 5-52-15
ブロ–ドウェイビル 3/F
11am-830pm
03-3386-9399
www.jackroad.co.jp
註:在新宿坐JR中央線往中野只需三個站五分鐘車程,車費¥150。

沒有留言:

發佈留言

注意:只有此網誌的成員可以留言。