2010年7月13日星期二

美容投資

L'Occitane International 上市!


法國護膚品牌 L'Occitane International(歐舒丹)(973)今天 5 月 7 日掛牌。


梗關我事,因為用咗一嚿錢抽新股嘛,又話只得 6 成中籤率,點知抽到好多,寫 blog 呢刻美股狂瀉,此新股聽朝必捱打,唉,時不與我!


女人天生愛投資扮靚事業,靚嘅要 keep,唔靚嘅就更加要付出,所以美容業務理應有前景。自問對美容行業也有一定認知,L'Occitane 品牌 image 向來很好,產品天然與優質深入民心,目前在全球共有一千五百間店鋪,睇埋主席及行政總裁 Reinold Geiger 充滿信心表示,計畫在未來五年在全球增設五百間自營分店,擴展策略包括潛力較大新興市場及業務尚未成熟的已發展國家,我都極有信心 L'Occitane 在消費力強勁的內地市場將必大有斬穫,相信未來盈利會有很可觀的增長。另外,歐舒丹已獲得中投斥資五千萬美元入股,持股約百分之七(六個月禁售期),這亦等同為我此投資舉動注入強心針。


買股如買衫!


講真,自己亦非投資高手,買股同買衫一樣,即興成份居多,不過我覺得揀衫同揀股都要睇往績,例如買 Chanel 袋就係睇中其往績好,又有班二手專家畀晒數據話點保值點抗跌;一如抽 L'Occitane International 時,我用 HSBC 網上抽新股,旁邊就詳列近半年新股往績及其至今表現,十隻有九隻升,只有一隻低過招股價,咁即係話抽新股著數多過蝕章。再者自己經常用 L'Occitane 產品,更知道有幾好賣和幾咁多人用;連我打畀品牌公關問新料時,佢都靜雞雞話我知有抽新股,順口問吓佢身為公司員工,抽新股有冇員工折扣呢?答案係冇。既然員工都睇好自己間公司,前路顯見。


仲記得早年新傳媒上市,當時身為《新假期》一份子,明知公司勁掂,唔使睇股評都要「訓」身支持公司抽新股啦,仲獲利 100% 添!相信該公關應是認同公司內部利好因素而決定支持,咁都唔抽就真係對唔住自己!呢個揀股心得真係非常唔理性,純屬女人購物心態加八婆仔脾性而得出,賺咗自當全數貢獻香港經濟全力消費,蝕咗?咪當鬼遮眼買咗件唔啱身既衫算囉!


行動支持!


即刻以身力行金錢上支持 L'Occitane 業務! 它最新推出的胭脂啫喱液就是心水推介,成份天然用得安心,有牡丹精華清新花香,兼可一物二用,在臉頰用手指輕印是自然剔透胭脂,效果非常貼面,液體特別啱乾性膚質,兼可當水潤唇采,櫻桃微紅色調很誘惑。心水清的美容專家相信也會將此新品與"B"字美容品牌的同類相比,話你知無需多諗,一是價錢平一半有多、二是質素不相佰仲!






水漾胭脂液 $130

沒有留言:

發佈留言

注意:只有此網誌的成員可以留言。