2010年7月13日星期二

流浮山 「達人」出手 「魚王」駕臨


天生沉迷海鮮,為品嚐至高無上的海產,一直廣結海鮮達人,足跡遍佈西貢、白沙灣、布袋澳、香港仔、流浮山......等等,只要有海鮮的地方,就有我的朋友。

難得今次母親節由我發辦,一於帶埋屋企人勇闖流浮山,由我相識多年的海鮮王者培哥主理,由佢揀選是日精選海鮮「即捕即解」,主題是抵食夾大件,再加一兩款罕有海鮮。

講起培哥,真是一個不可多交的海鮮王者,稱霸流浮山,就連香港最「嚐吃」的名嘴食家、達官貴人都指定由佢揀海鮮。名人陣容培哥當然如數家珍般告之,但一定補句不能刊登。相信 MORE 的 blog 友一定估估吓。呢!蔡瀾成日在專欄話帶倪匡等人到流浮山,都提過培哥個名、某傳媒集團揸 fit人每次喺屋企大宴親朋,都指定要培哥嘅海鮮,証明佢個朵夠響啦!

酒家是培哥主場,小桃園海鮮酒家。

OK,既然信得過培哥,連食乜都費事過問,去到坐低,叫聲起菜,十足食海鮮版的 Omakase,由師傅發辦!

第一道菜,椒鹽瀨尿蝦。培哥講過,瀨尿蝦唔係手臂咁大先為之好食,太大難煮,一煮得耐肉身就「鞋」,10 吋左右最 perfect,蝦肉同肉汁保留得最好。上枱一碟小山丘有成 16 隻,都平過 6 隻如手臂 size 的瀨尿蝦。

瀨尿蝦斬件椒鹽最惹味!

第二道菜,豉椒炒聖子。大條粗身蘇格蘭聖子王只適合蒜蓉蒸,一炒就「鞋」,會浪費晒,所以本地聖子細細條剛剛好,又抵食!

炒聖子,豉椒好食過豉汁!

第三道菜,同樣用本地龍蝦仔,一樣咁好肉地,味道鮮甜,肉質爽口,不比澳洲龍蝦差,又係平一截。

個人偏好上湯龍蝦伊麵,怕芝士膩!

第四道菜,蒜蓉粉絲蒸貴妃蚌,精華是粉絲索晒汁,反而隻蚌太奀無咬口,培哥話呢水唔夠肥美。冇所謂啦!平價海鮮當伴粉絲。

貴妃蚌蒸粉絲,蒜蓉汁超得!

第五道菜,炸流浮山大蠔,培哥點名是日蠔靚,本來不嚐炸的我絕口不沾,但當人人食完都好似食神上身咁大叫好好味呀,終於忍唔住試一口,嘩,從未食過咁好食的炸漿,鬆化無比,生蠔好似仲有心跳咁,充滿生命力同鮮味,蠔身厚而膏不腥,最後食了一隻半,超出預算!

炸漿看似厚實,咬一口始知鬆化無比,滋味飛天,充滿鮮味!

壓軸主角是魚王「三刀」!每次同培哥食魚,唔罕唔食,仲要必有海鮮知識落袋。我平日慣常去利園、西苑、聘珍樓、鍾菜,食東星斑、黑瓜子斑,原來在培哥眼中同紅衫魚冇分別,有時冇靚魚,培哥會煎條東星粗粗地咁食;試過幾次同佢食頂級游水龍利,洗手盤咁大條,仲有,要攞牌的蘇眉,人間滋味在心頭。今次媽咪話要食傳聞中魚王「三刀」,因從未食過,一於聽佢話。

何解魚王個朵叫「三刀」?實情全名「斬三刀」,身上有九條窄身「刀紋」,以往漁家蒸三刀時,由於魚身肉厚難熟,通常在中間位劏三刀才蒸,因而得名。那又何得何能自抬身價高至 $50/両、$60/両?培哥話因為水質受污染而令三刀鮮見於市面,就算有錢都未必食到,因為唔係周時有,好罕見喎,想食就要啱 timing!

游水三刀,靚仔得佢,陣間就食咗你!

「三刀」呢刻於流浮山海鮮檔嗌價$48/両,斤半重三刀已經價值千多元,仲未計油料錢。食落魚味濃而鮮香,肉身腍而不散,但不是很滑溜,與東星份屬截然不同的鮮味,講真,有點名過其實!但既然流浮山「三刀」與利園東星價相約,人一世物一世,同屋企試吓無妨,加上我有培哥友情價嘛。但緊記食三刀,識人至好試,否則等同俾人過三刀!

嘩!呢兩條三刀已經價值 $1,500!

第七道菜,陳皮蒸鮑魚,大隻、厚身、嫩滑,潔淨秘訣是不能用刀刮鮑魚面,一刮即「鞋」,只可用水沖洗。

蒸鮑魚,半隻手掌大!

切開好厚肉,Yummy!

第八道菜,清蒸奄仔蟹,每次都要等好耐,因為要先用冰水雪死奄仔,等蟹內的膏凝結,清蒸時蟹膏才不會蒸散流失,想食蟹膏精華就要有耐性,唔好催廚房呀。

清蒸奄仔蟹,膏塞滿蟹身,好食過黃油蟹添!

食完,捧住個肚返屋企,又要諗下點減肥!

生猛中蝦,眼仔碌碌,今次就放過你!

想跟我食得咁滋味,其實培哥都有間海鮮檔在旺角,每日將流浮山最新鮮的海鮮帶到市區,去到搵培哥,講聲係 Yoko 介紹,實有得平!

想知地址,依家話你知:

培哥海鮮檔 旺角奶路臣街街市〔華潤超市側〕,想留特別海鮮記住打佢手提,無任歡迎喎!想有折就撻我朵! 9830 2567

流浮山小桃園海鮮酒家 記住先打俾培哥訂位兼留靚海鮮,最緊要講明睇咗 MORE Blog 至有筍價!

9830 2567

沒有留言:

發佈留言

注意:只有此網誌的成員可以留言。