2010年7月13日星期二

身邊好友,各出其謀經營雙眼皮!

失敗篇!

單眼皮、內雙眼皮、多褶眼皮、不對稱眼皮…真懊惱!鬼叫呢期美女指標是勁深雙眼皮配假睫大眼。

激進派好友 D 一不做二不休幾個月前走去割雙眼皮,手術後兩星期眼見她眼皮超腫又粉紅,要「扮跌親」帶黑超去見客,「假」都無請過,真佩服其勇氣!她事前上網搜尋出名的整容醫生,求心安更指定診所要喺中環,謂最怕三教九流區遇上黄綠醫生,並搭路攞得個9 折,仍然要成 2 萬 2千,講真貴唔緊要至緊要靚。結果…蘇民峰話齋「人算不如天算」,消腫後顯見左右眼皮線位長短不一,右眼頭短咗,點算先?即找 X 醫生算帳,得到對答竟然是:「Ok 呀!無嘢喎,咪咁挑剔!」好友 D堅持再執,X 醫生屈住道火幫她做兩至三針吊眼線(即是皮下植入眼線),朋友話都唔知佢係咪玩嘢,打麻醉針喺眼皮時已經勁痛,但做手術時仍然超痛。過程先要戴類似硬膠片保護眼球,會感到不適,戲肉吊線尤如縫衫,只不過是在眼皮或布料上的分別,這位很、很、很忍得痛的朋友告知痛楚度達十級,拍得住生仔,幻想已經超驚!

唔知係 X 醫生技術差定我個 friend 唔好彩,整咗兩星期後眼皮吊線於不知不覺間甩鬼咗!!唉,白費心機又捱痛。X 醫生回覆:「卸妝或潔面時不小心導致,是人為。」到咗呢個地步,朋支 D 仲唔肯認命,想再整,我就講咗另一位朋友「估佢唔到、又抵又成功」的例子…

成功篇!

好友 J 常怨天生單眼皮令雙眼看來又細又無神,眼見 hair salon 同事輪流「霎眼嬌」,心大心細終於掟起心肝整整佢。呢批人辦看來又靚又自然的雙眼皮原來都是在深圳做手腳,乜話深圳?無錯,真係估佢哋唔到,膽大包天,唔怕出事無人可憐咩?!

結果好友 J 本著「工多藝熟、熟能生巧」的理論跟隨這深圳吊眼線整容熱潮。她將偷偷之行及過程告知,原來是美容院老板娘親手做而非醫生,店內設備簡陋,先注射麻醉藥在眉尾位置,然後進行眼皮拮針縫上手術線,她謂過程中沒半點痛楚,需要聽從指示雙眼開合,因為是單眼皮所以每邊眼要縫 10 多針才能固定,約半小時就完成,抵玩價 2 千元,真係平到無人信,約港價 1 折。朋友 J剛完成時雙眼似喊過,即有紅腫但未算可怕,她謂 2 天便消腫,一個月後見她的 new arrival 雙眼皮的確超掂,深得來自然,雙眼唔化妝都有神。美容院老板娘話待 3 至 4 個月效果會越來越靚。

大家係咪覺得好吸引呢?

身邊密友名模 model 知道後,即嚷著要柴娃娃組團返深圳,想整就整、唔整就食!我個人則有所保留,無錯,人工化後係索咗,但覺得無乜事後保障、麻醉藥又唔知邊度出,然而認同工多藝熟,上面間舖一日閒閒哋吊 10 幾個人眼線,我諗香港整容醫生 1 個月都冇 10 單生意。

自製雙眼皮!

我最近搜刮到勁掂的雙眼皮膠紙想推介俾大家,是夜用裝,特濶 2mm 剪裁(唔係衛生巾) ,夠闊身黏得穩,持之以恆貼足兩星期,我的多褶眼皮漸漸趨向單一化,眼皮吊線?待幾年後眼皮再垂且無法修飾至試啦!即刻親身示範貼前,同埋貼後分別有幾明顯。

日本夜用雙眼皮貼 約$40盒/莎莎

Before

After

沒有留言:

發佈留言

注意:只有此網誌的成員可以留言。