2010年7月13日星期二

羅漢果 之謎


自從《為食總司令》幟哥在節目中提及,飲羅漢果水醫好其乙型肝炎後,雖則無醫學根據,卻造就羅漢果繼冬蟲草後成為另一炒賣衍生工具,差在摩根大通未奏起「摩笛」,評級為買入及設下目標價,否則好過炒金!

濕疹都好轉

本來這事並沒有記在心頭,但上星期返《新假期》敘舊,見到常受濕疹困擾的同事,其皮膚有9 成轉好,她講起朋友及自己正用羅漢果水醫濕疹。她的中醫建議嚴重時早、午、晚各服 1 次,並謂其清熱毒的功效很快消散,所以要頻密飲用,即使有幸不受皮膚病困擾之士也宜飲用,可增強抵抗力。這位同事已睇過坊間無數中西醫,尋求奇異偏方、打針食藥、塗類固醇,總之不奢望斷尾只求感覺良好一點。她更聽從醫師以羅漢果水濕棉敷面及浸浴,連續兩個月效果顯著,我親眼見到此成果也覺神奇,她隨即問我有冇辦法買到更靚羅漢果云云,皆因知道我識海味乾貨專家,一問方知有料爆!

羅漢果炒賣

原來羅漢果價格自從被幟哥及蘇絲黃一講,立即掀即一陣搶購潮!大 size 羅漢果由 $3-$4/個炒上 $13-$14/個,坊間有些提供特大 size 羅漢果的店鋪仲可以賣到近 $20/個,近期價格回落,大size賣 $7 左右。反正唔係貴,即管試其虛實,就買兩盒,每個$4,即共 $160 埋單,如此靚價兼靚貨陣間教你去邊買!

羅漢果在坊間多是散裝的,此盒裝大 size 可以送俾朋友!

點揀靚羅漢果

價格並非重點,點樣買到靚羅漢果才重要。原來「新鮮」羅漢果要像節瓜一樣,果身帶毛茸為之新鮮,擺得太耐會甩毛變光滑‧;果身外殼唔可以裂開;搖一搖,如果有聲都唔係靚貨;仲有顏色要金綠,出咗斑點咪鬼揀,以上重點要記得。原來羅漢果都有品牌,坊間分帆船牌及壽星牌兩款,前者較貴因 size 較大,以特大及加大為主,後者以大及中為主,實情大細與功效無關,只係贏外形咁解。

唔靚的羅漢果,煲水出來會帶苦味,靚就嘗到甘甜。點煲?每次將一個羅漢果好似切橙咁切開,放入約 2 公升水,煲 20 分鐘即可,記佳焗多 15 分鐘效果更好。羅漢果水能醫好乙型肝炎唔敢講,但清朝也有記載此為藥性的果實,可治咳黃痰、口渴唇乾,還能潤腸通便、清熱瀉火,而對皮膚好則是過來人所講及的經驗。

果身帶毛茸為之新鮮(左),擺得太耐會甩毛變光滑且有斑(右)!

靚的羅漢果輕搖時應沒有聲音發出,果肉黏附殼才是新鮮。

聽完正方意見,又聽下反方見解。五月十四日《蘋果日報》名采專欄作家左丁山提到羅漢果熱潮,其對中醫有研究的朋友指出:「淨飲羅漢果煲水,與羅漢果沖劑係唔同o架。我就有一位女性朋友相信某人之言,日日飲,卒之在中環昏倒街頭,送院救治,我幾乎嚇死咗。羅漢果性質寒涼,唔係個個人可以長期飲用,女士尤其小心,常吃就要請教中醫,千祈唔好迷信名人名氣,人講你又信。」將此事問吓海味乾貨專家,他就教我加入果皮可以冇咁寒涼,我試過味道仲好咗!

我不是中醫,正方朋友素來濕疹嚴重,她的情況我完全解理,變好也是親眼目睹;但反方也有相當道理,就算維他命丸有益,也未必人人合適,且過量服用都會有反效果吧!試飲羅漢果水前,淺嚐無不可,深層使用應請教有關專家及配合個人體質。

講到這裏,又到答問環節,想買平靚正羅漢果,就要去西營盤海味街。如果你想知我幫襯開邊間有信譽又實惠的,留個 Comment 俾我,再話你知。

3 則留言:

  1. Can you share which shop to buy from for 平靚正羅漢果? My email: toniam241107@gmail.com

    回覆刪除
  2. 羅漢果功效好得,但要買靚的就好難,可否告知在那裡買到好的羅漢果,我的電郵是car4ur@gmail.com

    Thanks.

    回覆刪除
  3. 我在西營盤海味街買的,叫同昌海味,德輔道西149號地下,2549 8100

    回覆刪除

注意:只有此網誌的成員可以留言。