2010年7月13日星期二

東京大阪急行之食 飽到醉和牛內臟鍋


新店 Shabu Shabu!

今次日本之行,在食方面早有指定動作,以食鍋物為主,其一目標是 Shabu Shabu 放題,日本的放題質素特別高,唔似得香港的任食將貨就價等如食垃圾,所以每次訪日例必大擦,最適合我呢類打邊爐狂人。

而於 Shabu Shabu 有乜熱點推介?其實真係差唔多,有些每位 ¥1,800,但只得 90 分鐘,唔夠喉!今次就試新宿歌舞伎町內新開的「茜どき」 放題,¥2,100 位包任食肥牛(超濃牛味)、2 款薄片豬柳(其一脂胎肪多,入口即溶)及疏菜豆腐粉絲,限時 120 分鐘,另加 ¥500 仲可以轉湯底,如特式牛奶鍋,不過我就揀番最基本的昆布湯底,即係滾水淥海帶,純綷食肉質鮮味同調味醬料。





























在日本的 Shabu Shabu 店雖則冇強烈推介,但都有不推介的!旅遊書經常介紹既新宿牧場、涉谷牧場,由集團式經營,水準一致地咁無驚
喜,任食都唔好浪費肚皮。

必試 Motsunabe!

除 Shabu Shabu,もつ鍋(Motsunabe ,音:磨諸啦be)亦係今次必食之選。Motsunabe 即係內臟鍋,高脂肪高膽醇高度美味。在日本有形形式式的 Motsunabe,有牛有豬更有和牛,由於日本經濟差,近年平民小食抬頭,Motsunabe 與 Horumon (音:坷露芒,即專食豬牛內臟的燒肉場)呢類美味價廉的餐廳愈開愈多,大家去到日本不妨留意。

而今次就一嚐大阪和牛 Motsunabe,食佢都係因為被和牛兩字吸引。呢間「 じゃがいも一番」位於大阪梅田,座落地庫,本來都冇乜寄望,點知夜晚九點幾落到去,赫然全場爆滿,心中一喜,幾乎認定食物質素有保證。

先點鎮店之寶和牛 Motsunabe,¥924 /位,最少點 2 人份。

唔好以為和牛就一定係紅肉,話明食內臟,白色一件件的就係和牛 Motsu,全部用水啤到冇晒血,感覺勁乾淨,只等湯一滾就可以立即食落口。雖然入口都唔知食緊和牛邊種內臟,就當等同十三座牛雜般食吧。食落爽口唔油膩,很濃牛脂肪香味,絕對勁過少年食神牛魔王 Michael 成日掛喺口邊的牛胸油,嗰啖湯香甜到震,有種在香港絕對唔會接觸得到的食物感覺。

同場仲點了海老餃子,在香港從未試過只用蝦包、鐵板上的餃子,外皮很脆,咬落去啖啖蝦肉非常 juicy,同去麥奀記食鮮蝦雲吞一樣,正!

最欣賞的是鹽燒雞胸軟骨串,這串燒在香港已幾乎絕跡,現在全部都用最下等的雞軟骨代替,我知道柴灣有間凍肉批發專做日式串燒,來貨只需 $2 串,可惜冇零售吖!這種雞胸軟骨骨肉相間,有鬆脆的軟骨和可口的胸肉,是天下間最好食的串燒也。

由於太好食,食到我老公懶理醫生勸戒肥膩食物之言,冇飲過酒都有「飽到醉咗」的感覺,橫臥座椅上抖大氣,如果大家未試過飽到醉的感覺,不妨一試!

じゃがいも一番地址:大阪府大阪市北区堂山町3-13レインボープラザビルB1F

http://www.hotpepper.jp/strJ000012555/

沒有留言:

發佈留言

注意:只有此網誌的成員可以留言。